शंखधर साख्वा न्यायमूर्ति र समानताका अभियान्ता : प्रधानमन्त्री ओली

काठमाडौं । प्रधानमन्त्री केपी शर्मा ओलीले नेपाल संवतका प्रवर्तक, राष्ट्रिय विभूति शंखधर शाख्वा न्याय र समानताका अभियन्ता भएको बताएका छन् ।

नेपाल संवतको नयाँ बर्ष ११३९ का अवसरमा शुभकामना सन्देश दिंदै प्रधानमन्त्री ओलीले शाख्वाकै योगदानका कारण नेपालको मौलिक नेपाल संवत प्रचलनमा आएको बताएका छन् । शाख्वाको योगदान आज पनि नेपाली समाजमा उत्तिकै सान्दर्भिक रहेको प्रधानमन्त्री ओलीको शुभकामनामा उल्लेख छ ।

प्रधानमन्त्री ओलीले नेपाल संवतको शुरुवातको घटना नै प्रेरणादायी सन्दर्भ भएको बताएका छन् । ‘शंखधर शाख्वाः ले ११३९ वर्ष अघि ऋणमा बाँधिएका गरीब किसानहरुलाई आफ्नै सम्पत्ति खर्च गरेर ऋणबाट मुक्त गराउनु भएको थियो ।

त्यहीं बेलादेखि शुरु भएको नेपाल संवतले हामीलाई हरेक बर्ष नेपाली संस्कृतिमा विद्यमान परोपकारी भावनाको बारेमा बताउदै आएको छ’ प्रधानमन्त्री ओलीको शुभकामना सन्देशमा उल्लेख छ ।

ओलीले नेपाली समाजको गौरवशाली विगत र मूल्य मान्यतालाई अक्षुण्य राख्न समेत यो संवतले झक्झक्याउदै आएको बताएका छन् ।

शंखधर शाख्वाले ऋणमा डुबेर दासत्व जीवन बिताइरहेका सर्वसाधरणलाई ऋणबाट मुक्त गराएर स्वतन्त्रता दिलाएकै कारण उहाँ शताब्दीऔं पछि पनि नेपालीको मानसपटलमा बस्न सफल भएको प्रधानमन्त्री ओलीले आफ्नो शुभकामना सन्देशमा उल्लेख गरेका छन् ।

प्रतिक्रिया दिनुहोस्
X
Type to search