पाँचसय खर्च हुन्छ ८० रुपैयाँ विद्युत् महसुल तिर्न

पाल्पा । ग्रामीण क्षेत्रमा विद्युत् महसुल काउन्टर नहुँदा ८० रुपैयाँ विद्युत् महसुल तिर्न ५०० रुपैयाँ तिर्न बाध्य भएका छन् ।

जिल्लाका ग्रामीण क्षेत्रमा तत्कालीन द्वन्द्वमा असुरक्षाले हटेका ग्रामीण क्षेत्रका विद्युत् महसुल काउन्टर अझै स्थापना हुन नसक्दा उपभोक्ता मर्कामा परेका हुन ।

द्वन्द्वका बेला सदरमुकाम केन्द्रित भएका बैंक, प्रहरी चौकी र सरकारी कार्यालयले स्थापना भए पनि नेपाल विद्युत् प्राधिकरण पाल्पाले महसुल काउन्टर स्थापना गर्न पहलसमेत जिल्ला तहमा नभएको हो ।

जिल्ला सदरमुकाम तानसेनमा मात्र विद्युत् प्राधिकरणले महसुल काउन्टर सञ्चालन गरेकाले जिल्लाको पूर्वमा ८० किलोमिटर र पश्चिममा ६० किलोमिटरको दुरीबाट सवारी साधनमा चढेर मासिक विद्युत् महसुल तिर्न सदरमुकाम आउनुपर्ने बाध्यता रहेको छ ।

जिल्लाको पूर्वीभेग रामपुरमा इलाका प्रशासन सञ्चालन भएकाले त्यस भेगका बासिन्दा विद्युत् महसुल तिर्न आउनु पर्ने बाध्यता रहेको स्थानीयवासीको गुनासो छ ।

द्वन्द्वभन्दा अगाडि पश्चिममा हार्थोक, पूर्वका जनताको लागि आर्यभञ्ज्याङमा महसुल काउन्टर सञ्चालन गरेको थियो । महसुल काउन्टर बन्द भएको लामो समयसम्म पनि विद्युत् प्राधिकरणले पुनः सञ्चालनमा चासो देखाएको छैन ।

मासिक ८० रुपैयाको बिजुलीको बिल तिर्न आउँदा रु ५०० भन्दा बढी खर्च हुने भए पनि ग्रामीण भेगमा काउन्टर खोल्ने बारेमा विद्युत् कार्यालय, राजनीतिक दल र जिल्ला अन्य सरकारी निकाय मौन बसेका छन् ।

केन्द्रिय विद्युत् प्राधिकरणले जिल्लाका ग्रामीण भेगका महसुल काउन्टर सञ्चालन गर्न अनुमति नदिएकाले लामो समयसम्म राख्न नसकिएको विद्युत् कार्यालय पाल्पाका प्रमुख कपिलराज पाण्डेले बताए ।

जिल्लामा २९ हजार ग्राहकलाई सदरमुकाम काउन्टरमा आउनुपर्ने बाध्यता छ भने प्रर्याप्त काउन्टरसमेत खुल्ला नगर्दा घन्टौँ लाइन बसेर महसुल बुझाउने गरेका छन् । यता विद्युत् प्राधिकरणले भने कर्मचारीको अभाव भन्दै दुईवटा मात्रै काउन्टर दिउ‘सो ३ बजेसम्म खुल्ने गर्दछ । रासस

LEAVE COMMENT

Comment *
Your Name *
Email *
Website
 

Related Posts
Don't miss it
Editors choice